«Իրավաբանների հայկական ասոցիացիա» ՀԿ-ն իրականացրել է ՀՀ Դատական և իրավական բարեփոխումների 2022-2026 թվականների ռազմավարությունից բխող գործողությունների ծրագրի 2022-2024 թվականներին իրականացման ենթակա գործողությունների հասարակական մշտադիտարկում։
Մշտադիտարկման գործընթացի շրջանակներում կազմակերպվել են առցանց ֆոկուս խմբային քննարկումներ հիմնական շահագրգիռ կողմերի հետ, ներառյալ միջոցառումների ծրագիրն իրականացնողները, քաղաքացիական հասարակության կազմակերպությունները և փորձագետները: Քանակական մեթոդների կիրառությամբ ռազմավարության գործողությունների ծրագրերի իրականացման առաջընթացի վերաբերյալ հավաքագրվել է համապարփակ տեղեկատվություն, որի արդյունքում կատարվել են գնահատումներ։
Մշտադիտարկման խմբի կողմից մշակված մեթոդոլոգիայի համաձայն ընթացակարգային (քանակական) գնահատումն իրականացվել է հետևյալ երկու բանաձևերով՝
- ամբողջությամբ կատարված գործողությունների քանակի տոկոսային հարաբերակցության մեթոդով՝ գործողությունների ընդհանուր թվի նկատմամբ, որի արդունքում ընթացակարգային (քանակական) գնահատման ցուցանիշը 2022-2024թթ․–ների համար կազմել է 64,56%,
- վարիացիոն շարքի համակշռված միջինի մեթոդով, որի արդունքում ընթացակարգային (քանակական) գնահատման ցուցանիշը 2022-2024թթ․–ների համար կազմել է 75,32%։
Հասարակական մշտադիտարկման արդյունքում կազմվել է զեկույցի նախագիծ, որն ուղարկվել էր ռազմավարության կատարող և համակատարող բոլոր պետական մարմիններին և այլ շահագրգիռ կառույցներին՝ նախագծի վերաբերյալ առաջարկներ ու դիտարկումներ ստանալու նպատակով: Արդյունքում, ամփոփելով ստացված առաջարկներն ու դիտարկումները, մշակվել է զեկույցի վերջնական տարբերակը:
Ծանոթացե՛ք ՀՀ Դատական և իրավական բարեփոխումների 2022-2026 թվականների ռազմավարությունից բխող գործողությունների ծրագրի 2022-2024 թվականներին իրականացման ենթակա գործողությունների հասարակական մշտադիտարկման արդյունքների զեկույցին այստեղ։
Նաև նշենք, որ 2025 թվականի հունիսի 25-ին տեղի ունեցավ զեկույցի շնորհանդեսը, որի շրջանակներում ներկայացված սահիկաշարին կարող եք ծանոթանալ այստեղ։