2005

“2005թ.-ի Ֆիլիպ Ջեսափի անվան միջազգային իրավունքի դատախաղ”
Հայաստանի երիտասարդ իրավաբանների ասոցիացիան արդեն վեց տարի է, որ իր գործընկերների ու աջակիցների հետ միասին փորձում է Հայաստանին ևս հաղորդակից դարձնել միջազգային իրավունքի ասպարեզում տեղի ունեցող իրադարձություններին` կազմակերպելով “Ֆիլիպ Ջեսափի անվան միջազգային իրավունքի դատախաղ” մրցույթը: Մրցույթին յուրաքանչյուր տարի մասնակցում են Հայաստանի իրավաբանական բուհերի և բուհերի իրավաբանական ֆակուլտետների ուսանողներ: Մրցույթը աշխարհում ամենալայն ճանաչումը և հեղինակությունը վայելող իրավաբանական մրցույթն է և այն կարևոր դեր է խաղում իրավաբան ուսանողների մասնագիտական զարգացման ու կայացման գործում: Մասնակից երկրներում նախորոք անցկացվում են ազգային կամ տարածաշրջանային մրցափուլեր, որոշելու համար այն բուհը, որը կներկայացնի տվյալ երկիրը միջազգային մրցափուլում: Մրցույթի և ազգային, և միջազգային մրցափուլերում թիմերը, ներկայացնելով այս կամ այն մտացածին երկիրը, հանդես են գալիս ժյուրիի առջև` միջազգային դատարանի օրինակով, որը գնահատում է թիմերին:  Միջազգային փուլը, որն ավանդաբար անց է կացվում Վաշինգթոնում, ընդգրկում է տարբեր մրցափուլեր: Լավագույն երկու թիմերը հանդիպում են եզրափակիչ` Ջեսափի աշխարհի գավաթի խաղարկության փուլում:
Այս ծրագրի նպատակը Հայաստանում իրավաբանական կրթության զարգացմանը նպաստելն է, ուսանողների համար իրենց գործնական իրավական գիտելիքները ազատորեն ներկայացնելու հնարավորություն ընձեռելը և միջազգային իրավունքի, դատական նախադեպերի, փաստաբանական բանավոր և գրավոր հմտությունների համապատասխան փորձի ձեռք բերմանը նպաստելը: Այն նպաստում է ուսանողների միջազգային և ընդհանուր իրավունքին վերաբերող գիտելիքների մակարդակի բարձրացմանը, ուսանողների իրավական գրավոր խոսքի և բանավոր փաստաբանական հմտությունների գիտելիքների մակարդակի բարձրացմանը, հնարավորություն է ընձեռում օգտագործել Արդարադատության միջազգային դատարանի, Մարդու իրավունքների եվրոպական դատարանի և այլ տարածաշրջանային դատարանների դատական գործերի նյութերը, ինչպես նաև Միջազգային իրավունքին առնչվող նյութեր, որոնք ստացվում են Ջեսափի մրցույթի ընթացքում: Մրցույթին մասնակցությունը հնարավորություն է ընձեռում տեղական և արտասահմանյան իրավաբանական դպրոցների և իրավաբան ուսանողների միջև ակտիվ համագործակցություն հաստատելու համար:
“2005թ.-ի Ֆիլիպ Ջեսափի անվան միջազգային իրավունքի դատախաղ” մրցույթի հայաստանյան մրցափուլի հաղթող ճանաչված Ռուս–հայկական (Սլավոնական) պետական համալսարանի թիմը 2005թ. մարտի 29-ից ապրիլի 2-ը մասնակցեց ԱՄՆ-ի մայրաքաղաք Վաշինգթոնում կայացած միջազգային մրցափուլին: Այս տարի միջազգային մրցափուլին մասնակցում էին 79 երկրների 103 թիմեր: Ռուս–հայկական (Սլավոնական) պետական համալսարանի թիմը “2005թ. Ֆիլիպ Ջեսափի անվան միջազգային իրավունքի դատախաղ” միջազգային մրցույթում գրավեց 80-րդ տեղը, “Հարդի Դիլլարդ”-ի անվան լավագույն հայցադիմումների մրցույթում ներկայացված հայաստանյան թիմի հայցադիմումը 40-րդն էր: Մանրամասները կարող եք տեսնել “Ֆ.Ջեսափի անվան միջազգային իրավունքի դատախաղ” մրցույթի հայաստանյան մրցափուլի պաշտոնական վեբ կայքում :

“Իրավաբանական ռեսուրսներ և իրավաբանական օգնություն” ծրագիրը սկսվել էր 2004թ.-ի հոկտեմբերի 1-ին և շարունակվեց մինչև 2005թ. թվականի հունիսի 30-ը: Այս ծրագրի նպատակներն էին երիտասարդ իրավաբանների, երիտասարդ փաստաբանների և իրավաբան ուսանողների իրավաբանական կրթության շարունակությունը, ՀԵԻԱ ուսուցման և տեղեկատվության կենտրոնների գործունեության շարունակությունը, բնակչության սոցիալապես անապահով խավերին անվճար իրավաբանական ծառայությունների մատուցումը և ՀԵԻԱ Իրավաբան ուսանողների բաժանմունքի գործունեության իրականացումը: Ծրագրի իրականացման ընթացքում ՀԵԻԱ-ի գրասենյակներում անվճար իրավաբանական խորհրդատվություն մատուցվեց ՀՀ բնակչության սոցիալապես խոցելի խմբերին, հրատարակվեցին և տարածվեցին ԻՈՒԲ-ի եռամսյա պարբերական “Իրավաբան ուսանող” լրատուի հերթական համարները:
Ծրագրի ընթացքում երիտասարդ իրավաբանների համար կազմակերպվեցին երկու հանրապետական գիտաժողովներ`“Փաստաբանություն. ներկա վիճակը և զարգացման հեռանկարները ՀՀ-ում” և “Դատական համակարգ. ներկա վիճակը և զարգացման հեռանկարները” խորագրերով: Գիտաժողովների գրավոր փուլում առավելագույն միավորներ հավաքած լավագույն զեկույցների հեղինակները, գիտաժողովի պաշտոնական կանոնների համաձայն, իրավունք ստացան որպես զեկուցողներ մասնակցել եզրափակիչ` բանավոր փուլերին: Գիտաժողովների գրավոր և բանավոր աշխատանքները գնահատելու համար որպես գիտաժողովի փորձագետ դատավորներ հրավիրվեցին ճանաչված փաստաբաններ, իրավաբաններ և դատավորներ: Գիտաժողովի հաղթողները արժանացան արժեքավոր մրցանակների:
Գիտաժողովները լուսաբանվեցին զանգվածային լրատվության միջոցների կողմից: Երկու գիտաժողովների արդյունքում հրատարակվեցին և անվճար տարածվեցին գիտաժողովների համանուն նյութերի ժողովածուները:

Ծրագրի իրականացմանը աջակցել է Ամերիկյան իրավաբանների ընկերակցության Կենտրոնական Եվրոպայի և Եվրասիայի իրավական նախաձեռնության հայաստանյան գրասենյակը և Հայաստանում ԱՄՆ դեսպանատունը:

“Մարդու իրավունքների քարոզարշավ և ՀԵԻԱ ուժեղացում” ծրագիրը ՀԵԻԱ-ն իրականացրել է 2005թ.-ի օգոստոսի 1-ից` Զարգացման համագործակցության միջեկեղեցական կազմակերպության (ICCO) աջակցությամբ: Ծրագրի շրջանակներում ՀԵԻԱ-ն հրատարակել է և տարածում է մարդու իրավունքների վերաբերյալ 15 անուն տեղեկատվական թերթիկներ, որոնցում բնակչությանը մատչելի ձևով տրված է տեղեկատվություն մարդու իրավունքների և դրանց պաշտպանության մեխանիզմների վերաբերյալ: Տեղեկատվական թերթիկները անվճար բաժանվում են Երևանի, ՀՀ Սյունիքի, Գեղարքունիքի, Տավուշի, Շիրակի և Լոռու մարզերի բնակչությանը` ՀԵԻԱ-ի գրասենյակների ցանցի միջոցով:
Ծրագրի ընթացքում  ՀԵԻԱ-ն զարգացման ծրագրեր է իրականացնում երիտասարդ իրավաբանների վերապատրաստման ուղղությամբ` վերջիններիս մասնագիտական գիտելիքները կատարելագործելու համար, հնարավորություն տալով նրանց տիրապետելու փոփոխվող օրենսդրությանը: Մասնավորապես, ծրագրի շահառուների համար Երևան, Գյումրի, Վանաձոր, Գավառ, Իջևան, Գորիս և Կապան քաղաքներում ծրագրի շահառու երիտասարդ փաստաբանների,  երիտասարդ իրավաբանների, հանրակրթական դպրոցներում “Իրավունք” առարկան դասավանդող ուսուցիչների և իրավաբան ուսանողների համար կազմակերպվում են մարդու իրավունքներին նվիրված 16 սեմինարներից բաղկացած 2 դասընթաց: Այնուհետև վերապատրաստում անցած 84 դասավանդողները բնակչության` ուսանողների, հանրակրթական դպրոցների բարձր դասարանների աշակերտների և համայնքների բնակչության համար հանրային իրազեկման սեմինարներ են անցկացնում: Այս ծրագրի շրջանակներում ևս ՀԵԻԱ-ն իր գրասենյակների ցանցի միջոցով անվճար իրավաբանական խորհրդատվություն ու տեղեկատվություն է տրամադրում բնակչության անապահով խավերին: Ծրագրի շրջանակներում իրավաբաններին, իրավաբան ուսանողներին և իրավագիտությամբ հետաքրքրվողներին հնարավորություն է ընձեռնվում նաև օգտվել ՀԵԻԱ-ի անվճար իրավաբանական ռեսուրսներից: Բացի տեսական գրականությունից ՀԵԻԱ-ի շահառուները օգտվում են համակարգիչներում առկա ՀՀ օրենսդրության “Իրտեկ” տեղեկատվական-որոնողական համակարգից:

“ՀԵԻԱ հզորացում” ծրագրի իրականացումը ՀԵԻԱ-ի կողմից շարունակվեց նաև 2005թ.-ի ընթացքում: Սույն ծրագրի շրջանակներում տարվող աշխատանքները ուղղված էին հզորացնելու ՀԵԻԱ-ի ինստիտուցիոնալ զարգացումը և շարունակելու ասոցիացիայի կողմից մատուցվող անվճար իրավաբանական ծառայությունների իրականացումը` բարձրացնելով դրանց արդյունավետությունը, օգտակարությունը և հասանելիությունը: Ծրագրի իրականացման ընթացքում ՀԵԻԱ-ի շահառուներին հնարավորություն է ընձեռնվել անվճար օգտվելու ժամանակակից իրավաբանական գրականությունից, ամսագրերից ու տեսաժապավեններից, համակարգիչներից ու ՀՀ օրենսդրության էլեկտրոնային “Իրտեկ” համակարգից: Ծրագրի ընթացքում ՀԵԻԱ-ի գրասենյակների կողմից կազմակերպվել են օրենսդրության տարբեր ճյուղերի վերաբերյալ հանրային իրազեկման սեմինարներ, որոնց մասնակցել են իրավաբան ուսանողներ: ՀԵԻԱ-ի, Երևանյան գրասենյակում երիտասարդ իրավաբանների համար կազմակերպվել և անցկացվել է “Մարդու իրավունքներ և Եվրոպական իրավունք” թեմայով սեմինարների շարք: Ծրագրի ընթացում ՀԵԻԱ-ի Իրավաբանական կրթության և տեղեկատվության կենտրոնների կողմից Երևանի և ՀՀ մարզերի բնակչությանը մատուցվել են անվճար իրավաբանական ծառայություններ: Ծրագրի իրականացմանը աջակցում է Հոլանդական “ՔորդԷյդ” կազմակերպությունը:

“Հայաստանի Կառավարություն. Տեղեկատվության տարածում քաղաքացիների շրջանում” ծրագիրը Հայաստանի երիտասարդ իրավաբանների ասոցիացիան իրականացրեց ՄԱԿ-ի Զարգացման ծրագրի օժանդակությամբ և “Հայաստան. Հանրային ոլորտի բարեփոխումների ծրագրի” շրջանակներում: Ծրագրի հիմնական նպատակն էր հանրությանը տեղեկատվություն հաղորդել ՀՀ գյուղատնտեսության, աշխատանքի, քաղաքաշինության, վիճակագրության, մշակույթի և երիտասարդության, բնապահպանության, տրանսպորտի և կապի, լեզվի, արխիվային և հանրային ծառայությունները կարգավորող հանձնաժողովի գործունեության ոլորտներում մատուցվող հանրային ծառայությունների վերաբերյալ: Ծրագրի շրջանակներում  ՀԵԻԱ-ն, համագործակցելով համապատասխան նախարարությունների ու պետական կառույցների հետ, վերոնշյալ ծառայությունների վերաբերյալ հրատարակեց 21 անուն տեղեկատվական թերթիկներ, յուրաքանչյուրից 5000 օրինակ, որոնք բնակչության շրջանում անվճար տարածվեցին ՀՀ Կառավարության 3-րդ մասնաշենքում գործող տեղեկատվական կենտրոնի, վերը նշված նախարարությունների և պետական մարմինների, ՄԱԿ-ի Զարգացման ծրագրի և ՀԵԻԱ-ի կողմից:

“Միջնորդ դատարանների և միջնորդ քննության ինստիտուտի զարգացումը Հայաստանում” ծրագրի իրականացումը սկսվել է 2005 թվականի հուլիսի 20-ից: Եվրասիա հիմնադրամի աջակցությամբ, ABA/CEELI-ի տեխնիկական աջակցությամբ և Փոքր և միջին բիզնեսի հիմնադրամի հետ համատեղ իրականացվող այս ծրագիրն ուղղված է Հայաստանում միջնորդ քննության/հարթման և միջնորդ դատարանների զարգացմանը նպաստելուն` իրավաբաններին, փոքր և միջին ձեռնարկությունների ներկայացուցիչներին վեճերի լուծման այլընտրանքային եղանակների վերաբերյալ կրթելու, համապատասխան ուղեցույցերի, վարքագծի կանոնակարգի և  դատավարության կարգի հաստատման միջոցով, որը թույլ կտա փոքր և միջին բիզնեսի ներկայացուցիչներին լուծել ծագող վեճերը այլընտրանքային եղանակներով: Ծրագրի շրջանակներում միջազգային չափորոշիչներին համապատասխան իրականացված ուսուցման միջոցով, որպես միջնորդներ/հարթողներ են վերապատրաստվել շուրջ 25 մասնագետներ, ինչպես նաև վեճերի լուծման այլընտրանքային եղանակների վերաբերյալ իրազեկման դասընթացներ է անցկացվել Երևանի և ՀՀ մարզերի շուրջ 270 փոքր և միջին ձեռնարկությունների ներկայացուցիչների և նոր սերնդի իրավաբանների համար: Ծրագրի շրջանակներում գործում է թեժ գիծ, որի միջոցով ծրագրի իրականացման 9 ամիսների ընթացքում շուրջ 150 փոքր և միջին ձեռնարկությունների ներկայացուցիչների տրամադրվել են անվճար իրավաբանական ծառայություններ: Փոքր և միջին ձեռնարկությունների վեճերի լուծման նպատակով ծրագրի շրջանակներում Հայաստանի երիտասարդ իրավաբանների ասոցիացիայի և Փոքր և միջին բիզնեսի հիմնադրամի կողմից հիմնվել են միջնորդ դատարան և միջնորդական ծրագիր: Ծրագրի շրջանակներում ՀԵԻԱ-ի կողմից հրատարակվել են երեք անուն տեղեկատվական թերթիկներ` “Միջնորդ դատարանների և միջնորդ քննության զարգացումը Հայաստանում” ծրագիր, Միջնորդ դատարաններ և միջնորդ դատավարություն, Վեճերի լուծման այլընտրանքային մեթոդները թեմաներով, ինչպես նաև “Վեճերի լուծման այլընտրանքային մեխանիզմներ” ուղեցույցը, որոնք անվճար տարածվում են շահագրգիռ կազմակերպությունների ու անձանց շրջանում: ՀԵԻԱ-ն ստեղծել և գործարկել է ծրագրի վեբ կայքը, որտեղ մանրամասնորեն ներկայացվում են ծրագրի շրջանակներում անցկացված ուսուցումները, միջոցառումներն ու հրատարակված նյութերը, ինչպես նաև տեղեկատվություն է պարունակվում ծրագրի կազմակերպիչների ու գործընկերների մասին: Կայքում կարելի է ծանոթանալ նաև ՀԵԻԱ-ի և Փոքր և միջին բիզնեսի հիմնադրամի կողմից հիմնադրված միջնորդ դատարանին և թեմային առնչվող օրենսդրությանն ու իրավական ակտերին:

“Վարդենիսի և Ճամբարակի տարածաշրջանների քսան գյուղական համայնքների իրավական իրազեկության բարձրացում” ծրագիրը ՀԵԻԱ-ն սկսել է իրականացնել 2005թ.-ի սեպտեմբերի մեկից` “Շեն” բարեգործական հասարակական կազմակերպության աջակցությամբ` Զարգացման համագործակցության միջեկեղեցական կազմակերպության (ICCO) կողմից տրամադրված միջոցների հաշվին: Ծրագիրը նպատակ ունի շրջիկ ծառայությունների միջոցով ՀԵԻԱ-ի Գեղարքունիքի մասնաճյուղի ծառայությունները հասանելի դարձնել նաև  Վարդենիսի և Ճամբարակի տարածաշրջանների գյուղական համայնքների համար, որոնք հնարավորություն չունեն օգտվելու անհրաժեշտ իրավաբանական ծառայություններից: Ծրագրի իրականացման ընթացքում վերոնշյալ գյուղական համայնքների բնակչությանը մատուցվում են անվճար իրավաբանական խորհրդատվություն և տրամադրվում է անհրաժեշտ տեղեկատվություն, կազմակերպվում են հասարակական լսումներ ՏԻՄ-երի և գյուղական համայնքի անդամների մասնակցությամբ` նպաստելով բնակչության իրազեկմանը ՏԻՄ-երի գործունեության մասին և նրանց ներգրավմանը համայնքի կյանքին: Ծրագիրը նպաստում է Վարդենիսի և Ճամբարակի տարածաշրջանների գյուղական համայնքների բնակչության իրավագիտացության բարձրացմանը և ՏԻՄ-երի արդյունավետության բարձրացմանը:

Հիմնական դատական գործ
2005 թվականի նոյեմբերի 7-ին տեղի ունեցավ “ԱրմենՏել” ընկերության Ինֆորմացիոն տեխնոլոգիաների գլխավոր տնօրինության չորս բաժինների արհմիութենական սկզբնական կազմակերպությունների ընդհանուր ժողովը, որն աշխատակիցների մասնագիտական, աշխատանքային և սոցիալական իրավունքների պաշտպանության նպատակով, ՀՀ օրենսդրությամբ սահմանված կարգով ընդունեց 2005թ.-ի նոյեմբերի 17-ին նախազգուշական գործադուլ հայտարարելու մասին որոշում և իրականացրեց այն: Նույն թվականի նոյեմբերի 17-ին “ԱրմենՏել” ՀՁ ՓԲԸ-ի մի խումբ աշխատակիցներ դիմեցից Հայաստանի երիտասարդ իրավաբանների ասոցիացիային` իրավաբանական օգնություն տրամադրելու խնդրանքով: Հայաստանի երիտասարդ իրավաբանների ասոցիացիան բավարարեց աշխատակիցների խնդրանքը և նրանց տրամադրեց իրավաբաններ` դատարաններում և այլ մարմիններում աշխատակիցների իրավունքները անվճար հիմունքներով ներկայացնելու համար: Այն հանդիսացավ համագործակցության սկիզբ, որի շրջանակներում ՀԵԻԱ-ն մտավ շուրջ 50 աշխատակիցների խախտված իրավունքների պաշտպանության պատասխանատու բեռի տակ: Սույն դատական գործը դեռևս չի ավարտվել և այն շարունակվում է նաև 2006թ.-ին: Սույն դատական գործի մանրամասներին և նյութերին կարող եք ծանոթանալ գործի ինտերնետային էջում:

Սահմանադրական փոփոխությունների իրավական իրազեկության հասարակական կենտրոններ
Հայաստանի երիտասարդ իրավաբանների ասոցիացիան, Հայաստանի իրավաբանական հիմնադրամը և “ԼԻԳԼ ԸԼԱՅԸՆՍ” իրավաբանական ընկերությունը, կարևորելով ՀՀ Սահմանադրական փոփոխություններն ու Սահմանադրական փոփոխությունների վերաբերյալ քաղաքացիների իրավական իրազեկության բարձրացման անհրաժեշտությունը, Երևան քաղաքում և ՀՀ մարզերում հիմնադրեցին թվով 8 իրավական իրազեկության հասարակական կենտրոններ, որոնց միջոցով պրոֆեսիոնալ իրավաբանների կողմից 2005թ.-ի նոյեմբերի 1-ից սկսած հասարակությանը մատուցվեց անվճար իրավաբանական խորհրդատվություն: Կենտրոնները տեղակայված են եղել Երևանում, Գյումրիում, Վանաձորում, Գավառում, Իջևանում, Գորիսում, Կապանում` ՀԵԻԱ-ի գրասենյակներում և Արթիկում` ժամանակավոր գրասենյակում: Ընդհանուր առմամբ կենտրոնների ծառայություններից օգտվել են 1140 քաղաքացի, որոնցից 564-ը կամ ընդհանուրի 49.47%-ը իգական սեռի ներկայացուցիչներ են, 571-ը կամ 50,09%-ը` արական, իսկ 5-ը կամ 0,44%-ը` իրավաբանական անձինք: Հաճախորդների մեծամասնությունը` 694 հոգի, եղել են միջին տարիքի` 41-65 տարեկան, 344-ը` 18-ից 40 տարեկան, 101-ը` 65-ից բարձր տարիքի և միայն 3-ը` մինչև 18 տարեկան: Կենտրոնները 1055 հոգու մատուցել են անվճար իրավաբանական խորհրդատվություն սահմանադրության փոփոխված դրույթների ու բնակչությանը հուզող հարցերի վերաբերյալ, և սահմանադրական փոփոխությունների վերաբերյալ տեղեկատվություն և փոփոխությունների նախագիծ են տրամադրել 85 հոգու: Գրասենյակում իրավաբանական խորհրդատվություն է մատուցվել 696 հոգու, հեռախոսով` 439, ինտերնետով` 5: Քաղաքացիներին հուզող հարցերի մեծամասնությունը վերաբերել են Սահմանադրության` “Մարդու և քաղաքացու հիմնարար իրավունքներն ու ազատությունները” գլխին` 445 հոգի կամ ընդհանուրի 39%-ը, “Հանրապետության նախագահը” գլխի վերաբերյալ խորհրդատվություն է տրվել 421 հոգու` ընդհանուրի 36.9%, երկքաղաքացիության վերաբերյալ` 107 հոգու կամ ընդհանուրի 9.4%-ին, “Սահմանադրական կարգի հիմունքները” գլխի վերաբերյալ` 18 հոգու` 1.6%, “Ազգային ժողով գլխի” վերաբերյալ` 20 հոգու` 1.75%, “Կառավարություն” գլխի վերաբերյալ` 14 հոգու` 1.23%, “Դատական իշխանություն” գլխի վերաբերյալ` 54 հոգու` 4.73%, “Տեղական ինքնակառավարում” գլխի վերաբերյալ` 5 հոգու` 0.44%, այլ հարցերի շուրջ` 56 հոգու կամ 4.9%-ին: Իրավաբանները տեղեկացնում էին կենտրոններ դիմած քաղաքացիներին այն մասին, թե Սահմանադրության որ հոդվածը ինչպիսի փոփոխության է ենթարկվել, մեկնաբանում էին համապատասխան հոդվածները և պատասխանում քաղաքացիներին հուզող հարցերին: Սահմանադրական փոփոխությունների վերաբերյալ իրավական իրազեկման հասարակական կենտրոններն իրենց աշխատանքն ավարտել են 2005թ.-ի նոյեմբերի 25-ին:

Ամառ 2005 ուսանողական/կամավորական ծրագիր սփյուռքահայ իրավաբանների և իրավաբան ուսանողների համար
2005թ-ին Հայաստանի երիտասարդ իրավաբանների ասոցիացիան Դեպի Հայք հիմնադրամի հետ համատեղ իրականացրեց ուսանողական կամավորական ծրագիր սփյուռքահայ իրավաբանների և իրավաբան ուսանողների համար: Ծրագիրը նպատակ ուներ սփյուռքահայ ուսանողներին հնարավորություն ընձեռել մասնագիտական բնագավառում աշխատել Հայաստանում: Այն թույլ է տալիս սփյուռքահայ ուսանողներին ներգրավվել հայաստանյան կյանքին, կիրառել և զարգացնել իրենց մասնագիտական գիտելիքներն ու հմտությունները` աշխատելով տեղական հասարակական կազմակերպությունների հետ, ստեղծել նոր կապեր հայրենիքի հետ: Ծրագրի ընթացքում ՀԵԻԱ-ում հուլիս և օգոստոս ամիսներին աշխատեց Լոնդոնի համալսարանի իրավաբան ուսանող Արման Սարվարյանը: Ծրագրի ընթացքում ՀԵԻԱ-ի կամավորի կողմից ուսումնասիրվեցին ՀԵԻԱ-ի վեբ կայքի անգլերեն տարբերակի հիմնական էջերը և համապատասխան փոփոխություններ կատարվեցին ՀԵԻԱ-ի վեբ կայքում: Կամավորի կողմից համապատասխան առաջարկություններ արվեցին կազմված դրամաշնորհային առաջարկների, ՀԵԻԱ-ի գործընկերների հետ կատարվող նամակագրության և կազմվող անգլերեն փաստաթղթերի  կապակցությամբ: Կամավորը մասնակցել է ՀԵԻԱ-ի վեբ կայքում պարբերաբար տեղադրվող լուրերի թարգմանությանը, խմբագրել է ՀԵԻԱ-ի զարգացման պլանի անգլերեն տարբերակը, մասնակցել է ՀԵԻԱ-ի գործունեության և ծրագրերի հաշվետվությունների թարգմանությանը:
Կամավորի կողմից ՀԵԻԱ-ի աշխատակազմից և անդամներից կազմված 5 հոգանոց խմբի հետ անցկացվեցին անգլերենի բարելավման ուսուցումներ հետևյալ թեմաներով`

• Կրթական համակարգը Հայաստանում և Եվրոպական երկրներում,
• Արդյո՞ք փողը պետք է լինի ազդեցիկ գործոն արդարադատություն իրականացնողների համար,
• Հայաստանի Սահմանադրությունը եվրոպական երկրների Սահմանադրությունների համեմատությամբ,
• Հայաստանի անդամակցությունը ԵԽ-ին և ԵՄ-ին,
• Տեղեկատվության էլեկտրոնային ռեսուրսները. առավելություններն ու թերությունները,
• Քաղաքական և ընտրական բարեփոխումները Հայաստանում և հանրաքվեն,
• Արցախի հիմնախնդիրը, լուծման ուղղությունները,
• Ինչպե՞ս կարող է հայ երիտասարդությունը բարելավել կյանքը Հայաստանում,
• Սոցիալական հիմնախնդիրները Հայաստանում:

Կամավորը մասնակցել է գրասենյակում տրվող խորհրդատվություններին, ծանոթացել գործերին, որոնց վերաբերյալ կազմվել են գրավոր փաստաթղթեր կամ իրականացվել է ներկայացուցչություն դատարանում և մասնակցել է ՀԵԻԱ-ի հաճախորդների երեք դատական գործերով դատական նիստերի ՀԵԻԱ-ի իրավաբանների հետ:
Ծրագրի արդյունքում ստեղծվեց ծրագրի ինտերնետային էջը, որը մանրամասն տեղեկատվություն և նյութեր է պարունակում կամավորական ծրագրի մասին:

Լոնդոնի Միջազգային հանդիպումը և Եվրոպայի երիտասարդ իրավաբանների ասոցիացիայի Հանձնաժողովի ամենամյա հանդիպումը
2005թ.-ի սեպտեմբերի 30-ից հոկտեմբերի 2-ը Լոնդոնում կայացավ ավանդական Միջազգային հանդիպումը, որն արդեն 40 տարի կազմակերպվում է երիտասարդ իրավաբանների ու փաստաբանների կողմից` հնարավորություն ընձեռելով աշխարհի իրավաբաններին մասնակցելու Լոնդոնի իրավաբանական ոլորտի կարևորագույն միջոցառումներից մեկին: Այս տարի Միջազգային հանդիպմանը Հայաստանի երիտասարդ իրավաբանների ասոցիացիան ներկայացրեց Արման Սարվարյանը: Միջոցառումը սկսվեց միջազգային գիտաժողովով, որը նվիրված էր Եվրոպական իրավունքին: Հոկտեմբերի մեկին միջոցառումը շարունակեց Եվրոպայի երիտասարդ իրավաբանների ասոցիացիայի Հանձնաժողովի ամենամյա հանդիպումը, որը առիթ է ասոցիացիային անդամակցող խմբերին ու կազմակերպություններին միմյանց հետ հանդիպելու և իրենց գաղափարներն ու տեղեկատվությունը փոխանակելու համար: ՀԵԻԱ-ն 1998թ.-ից հանդիսանում է Եվրոպայի երիտասարդ իրավաբանների ասոցիացիայի անդամ: Հանդիպման ընթացքում Եվրոպայի երիտասարդ իրավաբանների ասոցիացիայի ղեկավարությունը ներկայացրեց կազմակերպության գործունեության կարևոր փոփոխությունները: Եվրոլոյեր պարբերականում, որն այսուհետ թողարկվելու և տարածվելու է նաև էլեկտրոնային տարբերակով, այժմ հոդվածներ են տպագրվում ասոցիացիայի անդամների մասին` տեղեկացվածության ու համագործակցության խթանման նպատակով: Եվրոպայի երիտասարդ իրավաբանների ասոցիացիան ցանկություն է հայտնել իր վարչության կազմում ընդգրկել ՀԵԻԱ-ի անդամներից մեկին: Միջազգային այս իրադարձությունը նոր հնարավորություններ է նախանշում կազմակերպության համար` թույլ տալով ներկայանալ և հաղորդակից լինել Եվրոպայի իրավաբանական կյանքին:

ԻՐԱԿԱՆԱՑՎԱԾ ԳՈՐԾՈՒՆԵՈՒԹՅԱՆ ՎԻՃԱԿԱԳՐԱԿԱՆ ՏՎՅԱԼՆԵՐ