2019թ. դեկտոմբերի 27-ին «Իրավաբանների հայկական ասոցիացիա» հասարակական կազմակերպության Շիրակի մարզային մասնաճյուղում տեղի ունեցավ «Հասարակական կազմակերպությունների մասին» Հայաստանի Հանրապետության օրենքում սպասվող փոփոխություններ և ԻՀԱ-ի Շիրակի մարզային մասնաճյուղի 2019 թվականի գործունեության հաշվետվություն» թեմայով միջոցառումը, որին մասնակցում էին Շիրակի մարզային ՀԿ-ների ներկայացուցիչներ, ընդհանուր թվով՝ 10 մասնակից:
Քննարկման ընթացքում ԻՀԱ-ի ՔՀԿ-ների զարգացման ծրագրի համակարգող Արտյոմ Մեսրոպյանը ներկայացրել է «Հասարակական կազմակերպությունների մասին» Հայաստանի Հանրապետության օրենքում սպասվող փոփոխությունների վերաբերյալ համապարփակ տեղեկատվություն, նշելով, որ նախագծի լրամշակվել և վերջնական տեսքի է բերվել այդ նպատակով ստեղծված ՔՀԿ-ՊԵԿ աշխատանքային խմբի արդյունավետ և կառուցողական աշխատանքի շնորհիվ, որում իր առանձնահատուկ ներդրումն են ունեցել ԻՀԱ-ն և գործընկեր հասարակական կազմակերպությունները։ Այնուհետև մասնակիցները զեկուցողին են ուղղել իրենց հարցերը, որոնք վերաբերում էին օրենքի նախագծով հասարակական կազմակերպությունների կողմից հաշվետվությունների ներկայացման նախատեսվող նոր չափորոշիչներին, ներառյալ հանրային դրամական միջոցների օգտագործման դեպքում հաշվետվությունների ներկայացման նոր ընթացակարգերին:
Այնուհետև ԻՀԱ կամավոր Լուսինե Մոսոյանի կողմից ներկայացվել է ԻՀԱ-ի Շիրակի մարզային մասնաճյուղի 2019 թվականի գործունեության հաշվետվությունը՝ անդրադարձ կատարելով մասնաճյուղի կողմից հասարակական կազմակերպություններին, ՓՄՁ-ներին և ֆիզիկական անձանց տրամադրված իրավաբանական և այլ աջակցությանը, տեղեկատվական ռեսուրսներին և ԻՀԱ-ի կողմից իրականացված ծրագրերի, այդ թվում Կառուցողական երկխոսության հանձնառություն ծրագրի շրջանականերում կատարված լայնամաշտաբ աշխատանքներին։
Քննարկման ավարտին մասնակիցները կարևորեցին նման ձևաչափով հանդիպումները՝ նախ հաշվի առնելով այն, որ «Հասարակական կազմակերպությունների մասին» ՀՀ օրենքն իրենց ամենօրյա գործունեությունը կանոնակարգող հիմնական օրենսդրական ակտն է համարվում, հետևաբար, կարևոր է պատշաճ իրազեկված լինելն օրենսդրական սպասվող փոփոխությունների վերաբերյալ, ինչպես նաև այն, որ մարզերում գործունեություն իրականբացնող ՀԿ-ները մեծամասամբ ներգրավված չեն լինում օրենսդրական նախագծերի մշակման գործընթացներում և շատ հաճախ ամբողջական պատկերացում չունեն առաջարկվող փոփոխությունների վերաբերյալ:
