Եվրամիության կողմից ֆինանսավորվող «Կառուցողական երկխոսության հանձնառություն» ծրագրով իրականացվող «Հայկական Բիզնես Կոալիցիայի կարողությունների զարգացման ծրագրի» շրջանակներում այսօր՝ ապրիլի 16-ին տեղի ունեցավ «Բիզնեսի և քաղաքացիական հասարակության ներկայացուցիչների մասնակցությունը գնումների ոլորտի օրենսդրության բարեփոխումների իրականացմանը» թեմայով քննարկումը:
Քաղաքացիական զարգացման և համագործակցության հիմնադրամի տնօրեն Գագիկ Վարդանյանը ողջույնի իր խոսքում նշեց, որ հանդիպման նպատակը վերջին շրջանում ակտիվորեն քննարկվող գնումների ոլորտում օրենսդրական փոփոխություններ նախատեսող նախագիծն է:
ՀՀ ֆինանսների նախարարության ներկայացուցիչները նախարարի առաջին տեղակալ Կարեն Բրուտյանը նշեց, որ օրենսդրական բարեփոխումների նպատակով անցկացվում են հանդիպումներ հասարակական և բիզնես հատվածի ներկայացուցիչների հետ, որոնց արդյունքում ակնկալվում է ախտորոշել և բարձրաձայնել բոլոր խնդիրները:
«Գնումների բովանդակությունը պետք է լինի այնպիսին, որ դեռևս բյուջետային քննարկումների փուլում գերատեսչությունները հանրությանը ներկայացնեն իրենց կարիքները՝ հիմնավորելով դրանց նպատակը: Գնումների գործընթացը ամենառիսկային ոլորտներից մեկն է, ուստի այստեղ ամենակարևորը հրապարակայնության և հաշվետվողականության ապահովումն է, որը պետք է իրականացվի քաղհասարակության անմիջական մասնակցությամբ», – ասել է Բրուտյանը:
Նա ևս մեկ անգամ վերահաստատեց ֆինանսների նախարարության հետ ցանկացած ժամանակ համագործակցելու պատրաստակամությունը:
ԿԵՀ ծրագրի ղեկավար, «Իրավաբանների հայկական ասոցիացիա» ՀԿ-ի նախագահ Կարեն Զադոյանի խոսքով, բիզնեսը և քաղհասարակության կազմակերպություններն արձագանքում են այն դեպքերում, երբ արդեն օրենքներն ու նախագծերն ընդունված են, իսկ խաղի կանոնները՝ սահմանված:
«Այժմ բացառիկ հնարավորություն է մասնակցել այդ խնդիրների վերհանմանը: Պետք է լուրջ ախտորոշում կատարվի, որպեսզի հետո բուժումը ճիշտ կազմակերպվի»,-նշեց նա:
Գնումների ոլորտի օրենսդրության փոփոխությունների նախագծի հիմնական դրույթները ներկայացրեց ֆինանսների նախարարության պետական գնումների քաղաքականության վարչության պետ Սերգեյ Շահնազարյանը:
ԻՀԱ ներկայացուցիչ Լուսինե Նալբանդյանը նշեց, որ պետական գնումների ոլորտում կոռուպցիոն ռիսկերը բազում են, բայց ամենից շատ տարածված է գնումների տեխնիկական բնութագրերի՝ կոնկրետ ընկերության համար հատուկ չափորոշիչների մշակման արատավոր պրակտիկան։ Լուսինեն այնուհետև ներկայացրեց Իրավաբանների հայկական ասոցիացիայի կողմից գործարկվող Բիզպաշտպան ազդարարման հարթակի միջոցով ստացված մի շարք ահազանգներ նշյալ չարաշահումների վերաբերյալ։
ԻՀԱ ներկայացուցիչ, գնումների մասնագետ Մարիամ Զադոյանն էլ հավելեց, որ գնումների ոլորտում տեղ գտած մի շարք կարգավորումներ գործնականում չեն պահպանվում, ինչը մասնավորապես պայմանավորված է պետական պատվիրատուների մոտ գնումների գործընթացում ներառված անձանց ոլորտային գիտելիքների պակասով։ Առաջարկվեց նաև ներդնել գնումների մասնակիցների վարկանիշային և մոնիթորինգի համակարգ, որը կկազմի հայտերի վերջնական գնահատման մի մաս։ Համակարգում որպես էական գործոններ առաջարկվում է դիտարկել ընկերությունների կողմից կորպորատիվ կառավարման համակարգ ունենալը, կորպորատիվ կառավարման տարեկան զեկույց հրապարակելը և հակակոռուպցիոն համապատասխանության ընթացակարգեր նախատեսելը։
Քննարկման ավարտին մասնագետները պատասխանել են ՀԿ ներկայացուցիչների ոլորտային հարցերին և պայմանավորվածություն է ձեռք բերվել, որ ՀԿ ներկայացուցիչները օրենսդրական փոփոխությունների վերաբերյալ իրենց առաջարկությունները ներկայացնեն ֆինանսների նախարարություն:
«Կառուցողական երկխոսության հանձնառություն» ծրագիրն իրականացվում է ԵՄ ֆինանսավորմամբ՝ «Իրավաբանների հայկական ասոցիացիա» ՀԿ-ի կողմից գործընկերներ «Ագորա Սենթրլ Յուրոփ» ՀԿ-ի (Չեխիա), «Ժողովրդավարական կրթության հայկական կենտրոն-ՍԻՎԻՏԱՍ» ՀԿ-ի, «Մարդկային զարգացման միջազգային կենտրոն» ՀԿ-ի, «ՓՄՁ համագործակցության ասոցիացիա» ՀԿ-ի և «Հայաստանի համայնքների միություն» իրավաբանական անձանց միության հետ համագործակցությամբ:
Ծրագրի նպատակն է մեծացնել քաղաքացիական հասարակության կազմակերպությունների (ՔՀԿ) և դրանց կոալիցիաների/ցանցերի ազդեցությունը հանրային քաղաքականության մշակման գործընթացի վրա։ Սա հնարավորություն կտա կազմակերպություններին (ովքեր արդեն իսկ աշխատում են թիրախային կոալիցիաներում) ձեռք բերել նոր ռեսուրսներ, քաղհասարակության փորձագետներին միավորել և խրախուսել իրենց մասնակցությունը տեղական և ազգային քաղաքականությունների օրակարգի ձևավորմանը, հատկորոշել ընդհանուր խնդիրներն ու առաջնահերթությունները և դիմել կառավարությանը՝ կառուցողական և ռազմավարական քաղաքականության վերաբերյալ նախաձեռնություններով։
Ծրագրի շրջանակներում ենթադրամաշնորհներ են տրամադրվել ՔՀԿ-ներին և ՔՀԿ-ների կոալիցիաներին, որոնք կուղղվեն հանրային քաղաքականությունների զարգացմանն ու կունենան շոշափելի արդյունքներ 9 թիրախային ոլորտում, որոնք են արդարադատությունը, մարդու իրավունքները, հանրային ֆինանսների կառավարումը, բիզնեսը, կրթությունը, սոցիալական ոլորտը. հաշմանդամություն ունեցող երեխաների սոցիալական ներառում, գյուղատնտեսությունը, տնտեսությունը, էներգետիկան:
Քննարկման ավարտին մասնագետները պատասխանել են ՀԿ ներկայացուցիչների ոլորտային հարցերին և պայմանավորվածություն է ձեռք բերվել, որ ՀԿ ներկայացուցիչները օրենսդրական փոփոխությունների վերաբերյալ իրենց առաջարկությունները ներկայացնեն ֆինանսների նախարարություն:
