ՀՀ-ում կանանց քաղաքական մասնակցության ոլորտը կարգավորող օրենսդրության բարեփոխումների վերաբերյալ սեմինար Երևանում

2008թ.-ի մայիսի 8-ին Հայաստանի երիտասարդ իրավաբանների ասոցիացիայի Երևանյան մասնաճյուղի գրասենյակում անցկացվեց ՀՀ-ում կանանց քաղաքական մասնակցության ոլորտը կարգավորող օրենսդրության բարեփոխումների վերաբերյալ սեմինար-քննարկում: Սեմինարը կազմակերպվել էր ՀԵԻԱ-ի կողմից իրականացվող “Իրավաբանական օգնության և տեղեկատվության օժանդակություն” ծրագրի շրջանակներում: Սեմինարը վարում էր Հայաստանի երիտասարդ իրավաբանների ասոցիացիայի իրավաբան` Սյուզաննա Սողոմոնյանը: Սեմինարին մասնակցում էին հասարակական կազմակերպությունների և իրավաբանական բուհերի ներկայացուցիչներ, փաստաբաններ, իրավաբաններ:
Քննարկման սկզբում ներկաների ուշադրությանը ներկայացվեցին գործող ՀՀ Ընտրական օրենսգրքի և “Կուսակցությունների մասին” ՀՀ օրենքի այն հոդվածները, որոնք խոցելի էին դարձնում կանանց քաղաքական մասնակցությունը: Այնուհետև մասնակիցները վերլուծեցին ներկայացված հոդվածները և եկան այն համոզման, որ վերոնշյալ հոդվածները անհրաժեշտ է բարելավել` կատարելով համապատասխան օրենսդրական փոփոխություններ: Վերջիններիս վերաբերյալ սեմինարի մասնակիցների կարծիքներն ու առաջարկությունները գրառվեցին: Այնուհետև, մասնակիցներին առաջարկվեց առաջիկայում իրենց օրենսդրական առաջարկություններն ու դիտողությունները գրավոր ներկայացնել ՀԵԻԱ-ի կենտրոնական գրասենյակ, որոնք համապատասխան մշակումից հետո ՀԵԻԱ-ի կողմից կձևակերպվեն, որպես օրենսդրական փոփոխություններ կատարելու առաջարկներ և կներկայացվեն ՀՀ Ազգային Ժողով: