Քաղաքացիներն ամեն օր բախվում են տարբեր խնդիրների, օրինակ՝ քննչական մարմինների կամ այլ մարմինների ոչ արդյունավետ աշխատանքի հետևանքներին, ամեն օր ապրում են, առնչվում դրանց հետ․ այս մասին Iravaban.net-ի հետ զրույցում ասաց փաստաբան Տիգրան Եգորյանը։
«Այս պրոբլեմներն առաջանում են պետության ոչ լիարժեք ֆունկցիոնալության հետևանքով։ Պետության անունից գործող մասնագետների, պաշտոնյաների ոչ լիարժեք և ոչ բավարար մասնագիտական հմտությունների և/կամ արդյունավետ գործողությունների արդյունքում, մարդկանց մոտ սկսում է նվազել վստահությունը այդպիսի մարմինների, այդպիսի գործիքների նկատմամբ։ Սա բնական շղթայական էֆեկտ է և այս էֆեկտը կտրելու համար պետք է լուրջ աշխատանք կատարել, խորանալ ամեն առանձին հարցի բաղադրիչների մեջ և սկսել դրանք լուծել, ոչ թե շարունակել վերնագրեր փոխել»,-ասաց փաստաբանը։
Խոսելով ազդարարման համակարգի մասին՝ Տիգրան Եգորյանը նշեց, որ քաղաքացիների կողմից ազդարարման պասիվության պատճառը հենց դա է։
Ի պատասխան այն դիտարկմանը, որ Իրավաբանների հայկական ասոցիացիայի կողմից գործարկվել է Haytnir.am ազդարարման առցանց հարթակը, որի հիմնական նպատակն է՝ Հայաստանում խթանել կոռուպցիայի դեմ պայքարը, ստանալ հանրության աջակցությունը հակակոռուպցիոն պայքարում, օժանդակել ազդարարման համակարգի բարելավմանը, նպաստել ազդարարների վերաբերյալ Հայաստանում հանրության շրջանում ձևավորված իրավամտածողության և մշակույթի փոփոխմանը՝ ձգտելով ազդարարի՝ որպես ՀՀ քաղաքացու դրական և պահանջատեր իմիջի կերտմանը, նշեց, որ այն շատ կարևոր համալրող գործիք է։
«Աշխատանքի արդյունավետությունը էլի կախված է այն մարմինների աշխատտանքի արդյունավետությունից, որոնք պետք է իրականացնեն այդ հարցերով ուսումնասիրությունները։ Եթե այդ ուսումնասիրություններն ու քննությունները լինելու են մակերեսային, եթե լինելու են ոչ բավարար բազմակողմանի, խորը և ընդգրկուն, ապա այս գործիքները ցավոք ինքնին չեն կարող ապահովել այն արդյունքը, որի օժանդակմանը միտված են։ Այս բարդ իրավիճակում էլ այն դրական դինամիկա է ցուցադրում»,-ասաց Տիգրան Եգորյանը։
Մանրամասները՝ տեսանյութում
Քաղաքացիները կարող են բացահայտ ու անանուն հայտնել իրենց հայտնի կոռուպցիոն և այլ դեպքերի մասին՝ Haytnir.am ազդարարման առցանց հարթակի միջոցով։ Հայտ ներկայացնելն անվճար է։
Հավելենք, նաև որ հրապարակումը պատրաստվել է «Իրավաբանների հայկական ասոցիացիա» հասարակական կազմակերպության (ԻՀԱ) «Ազդարարման բազմակողմանի խթանում Հայաստանում» ծրագրի շրջանակներում, որն իրականացվում է Բաց Կառավարման Գործընկերության (ԲԿԳ) աջակցությամբ՝ Եվրոպական Միության (ԵՄ) կողմից ֆինանսավորվող «ԵՄ-ն հանուն բարեվարքության՝ Արևելյան գործընկերության համար» ծրագրի շրջանակներում։
Սույն հրապարակմամբ արտահայտված է հեղինակի՝ ԻՀԱ դիրքորոշումը, որի համընկնումը ԲԿԳ և ԵՄ դիրքորոշման հետ պարտադիր չէ: