Վարչապետ Նիկոլ Փաշինյանն այսօր՝ փետրվարի 9-ին, Սահմանադրական դատարանի հիմնադրման 28-ամյակին նվիրված միջոցառմանը իր ելույթում հետևյալ միտքն է արտահայտել. «Արդարադատությունն ինստիտուտ է, իսկ արդարությունը՝ զգացում»:
Iravaban.net-ը դիմել է Իրավաբանների հայկական ասոցիացիայի նախագահ Կարեն Զադոյանին՝ խնդրելով մեկնաբանել գործադիրի ղեկավարի արտահայտած միտքը:
ԻՀԱ նախագահն ի պատասխան նշել է, որ յուրաքանչյուրը, այդ թվում երկրի վարչապետը, ազատ է արտահայտելու իր մտքերը արդարադատության, արդարության մասին և ինքը չի պատրաստվում մեկնաբանել դրանք:
Կարեն Զադոյանը սակայն ներկայացրեց իր պատկերացումները «արդարադատություն» կատեգորիայի մասին:
«Արդարադատություն կատեգորիան կազմված է երկու տարաբնույթ, սակայն համակշիռ բաղադրիչներից` արդարությունից և դատավարությունից: Արդարությունը բարոյական, իսկ դատավարությունը իրավական ոլորտի բաղադրիչ է, առանց դրանց ներդաշնակ համադրման իրական արդարադատություն չի կարող իրականացվել:
Օրինակ` եթե դատավորը արհեստավարժ կերպով տիրապետում է նյութական և դատավարական օրենսդրությանը, սակայն ազնիվ և բարեվարք չէ, նա կիրականացնի խաթարված արդարադատություն: Նույնը հակառակ պարագայում, եթե դատավորը ազնիվ և բարեվարք է, սակայն արհեստավարժ կերպով չի տիրապետում նյութական և դատավարական օրենսդրությանը, ապա նույնպես կիրականացնի խաթարված արդարադատություն:
Ելքը մեկն է․ իրական արդարադատության բարոյական և իրավական համակշիռ բաղադրիչների ներդաշնակ համաիրականացնումը:
Երբ իրականացվում է իրական արդարադատություն, ապա, որպես հետևանք քաղաքացիները գտնում են իրենց արդարությունը սեփական երկրում։ Այն չեն փնտրում երկրից դուրս, օրինակ՝ Մարդու իրավունքների եվրոպական դատարանում»- նշել է Կարեն Զադոյանը:
ՍԴ-ում նշված միջոցառման ժամանակ Նիկոլ Փաշինյանը հայտարարել է նաև, որ արդարադատության գործող ինստիտուտները դեռևս արդարության զգացում չեն սերմանում Հայաստանի Հանրապետության քաղաքացիների մեջ:
Iravaban.net-ի այս հարցի վերաբերյալ Կարեն Զադոյանը նշեց, որ արդարության զգացում քաղաքացիների մոտ բացակայում է, քանի որ այժմ ՀՀ-ում արդարադատության արդարություն բաղադրիչը կաղում է, իսկ դրա պատճառը` արդարադատություն իրականացնող արժանի և բարեվարք կադրերի պակասն է։